Буйл тайрах /Gingivectomy/ гэж юу вэ?

Буйл тайрах буюу буйлны хэлбэрийг засах гэдэг нь буйлыг хэлбэржүүлэх шүдний гоо сайхны процедур юм. Энэхүү эмчилгээ нь буйл, шүдний төрх хэлбэрийг өөрчилсж таны инээмсэглэлийг улам бүр тодруулна.

Буйл тайрах мэс ажилбарыг лазер эсвэл мэс заслын (уламжлалт) аргаар хийх боломжтой. Хоёр процедур нь ижил үр дүнд хүргэдэг боловч өөр өөр үе шаттай байдаг. Шүдний эмч лазераар буйл тайрах мэс ажилбарын үеэр буйлны эдийг арилгахын тулд гэрлийн энерги ялгаруулдаг өндөр чадалтай шүдний лазерийг ашигладаг. Уламжлалт буйл тайрах мэс ажилбар нь буйлны эдийг мэс заслын хутгаар тайрч авдаг.

Буйлны тэгш бус шугамыг юу үүсгэдэг вэ?

Гингивэктоми бол  буйл нь шүдийг хэт их  бүрхсэн эсвэл шүдээ хангалттай бүрхээгүй хүмүүст тохиромжтой сонголт юм. Жишээлбэл, хэтэрхий урт буйл нь таны шүдийг жижиг харагдуулдаг. Хэрэв та шүдний бүрээс эсвэл имплант суулгасан бол буйл тэгш бус болж болно.

Гингивэктомийн бусад үзүүлэлтүүдэд дараах зүйлс орно:

Генетик - генетикийн хүчин зүйлээс шалтгаалан зарим хүмүүс буйлны тэгш бус шугамтай байдаг. Хэрэв таны буйл эрүүл мэндэд ямар нэг асуудал үүсгэхгүй бол буйлны хэлбэрийг өөрчлөх нь эрүүл мэндийн хувьд зайлшгүй шаардлагатай биш юм.

Буйлны өвчин - шүдний тулгуур эдийн үрэвсэлтэй хүмүүс буйл тайруулах нь ашигтай байж болох юм.

Буйл хэлбэржүүлэх нь эрүүл мэндийн хувьд зайлшгүй шаардлагатай юу?

Буйл хэлбэржүүлэх нь гоо сайхны процедур бөгөөд хувь хүний сонголт юм. Мөн зарим тохиолдолд эрүүл мэндийн зайлшгүй шаардлагатай байдаг.

Хэрвээ та шүдний тулгуур эдийн өвчний улмаас таны буйл шамарсан бол энэ процедур нь таны шүдний эмчилгээний төлөвлөгөөний зайлшгүй хэсэг байж болох юм.

Шаардлагатай бусад мэс засалд буйлны халаасыг (pocket) багасгах, шүдний цөгцийг уртасгах, яс нөхөн төлжүүлэх эмчилгээ зэрэг орно.

Буйл хэлбэржүүлэхийн ашиг тус юу вэ?

Гингивэктоми мэс засал олон давуу талтай. Үндсэн давуу талууд нь:

Энэ нь аюулгүй процедур бөгөөд ихэнх өвчтөнүүд ямар нэгэн гаж нөлөөгүйгээр хурдан эдгэрдэг гэсэн үг юм.

Хэрэв таны шүдний сурвалж ил гарсан бол гингивэктоми нь хүйтэн, халуун, эсвэл чихэрлэг зүйлд мэдрэмтгий байдлыг бууруулахад тусалдаг.

Хэрэв та шүд болон буйландаа анхаарал тавьбал үр дүн нь хэдэн арван жил үргэлжилж болно. Үүнд өдөрт хоёр удаа фтортой шүдний оогоор угаах, өдөр бүр шүдний утас хэрэглэх, ам зайлагчаар тогтмол зайлах зэрэг орно. Түүнчлэн та зургаан сар тутамд шүдний эмчид очиж тогтмол шүдээ цэвэрлүүлэх, шүдний эмчийн үзлэгт хамрагдах хэрэгтэй.

Уг процедур хэрхэн явагддаг вэ?

Гингивэктомийн мэс засал харьцангуй хурдан бөгөөд шүдний эмчийн өрөөнд шууд хийх боломжтой. Таны сонгосон эмчилгээнээс хамаарч шүдний эмч лазер эсвэл мэс заслын хутга ашиглан буйлны эдийг тайрах эсвэл нэмж өгөх болно. Процедурт хэд хэдэн үндсэн алхамууд орно, үүнд:

1. Мэс заслын өмнө

Процедурын өмнө шүдний эмч таны буйл дээр тусгай үзэг ашиглан хичнээн хэмжээний эдийг авах эсвэл нэмж оруулахыг тодорхойлон тэмдэг тавина. Үр дүнд нь сэтгэл хангалуун байхын тулд тэд процедур эхлэхээс өмнө юу хийхээр төлөвлөж байгаагаа харуулах болно.

2. Хэсгийн мэдээ алдуулалт

Буйлан дээр тэмдэг тавьсны дараа шүдний эмч буйланд хэсгийн мэдээ алдуулалт  хийх болно. Та процедурын үеэр сэрүүн байх боловч ямар ч өвдөлт мэдрэхгүй болно. Хэрэв та зүү эсвэл ерөнхийдөө мэс засал хийлгэхээс айдаг бол тайвшруулах эмчилгээний (sedation) талаар шүдний эмчээсээ асуугаарай.

3. Мэс заслын үеэр

Хэсгийн мэдээ алдуулалт 5-10 минутын дараа бүрэн хүчин төгөлдөр болно. Дараа нь шүдний эмч мэс заслын хутга эсвэл лазерын технологи ашиглан буйлны эдийг авч эсвэл нэмэж эхэлнэ. Уг процедур ерөнхийдөө 1-2 цаг үргэлжилдэг.

4. Мэс заслын дараа

Уг процедурын дараа буйл, шүдээ хэрхэн арчлах талаар дэлгэрэнгүй зааварчилгаа өгөх болно. Үүнд идэж уухаас татгалзах зүйл орно. Та бүлээн эсвэл халуун ундаа ууж болохгүй, мэс засал хийснээс хойш долоо хоног орчим л зөөлөн хоол идээрэй. Түүнчлэн, эдгэрэх явцад архи, тамхи хэрэглэхгүй байх.Та өвдөлт намдаах зорилгоор эмчийн зааврын дагуу өвдөлт намдаах эм ууж болно. Цус алдалт ихсэх тул аспирин уухаас татгалзаарай.

Мөн буйл бүрэн эдгэртэл халуун ногоотой болон халуун хоол, халуун уух зүйл хэрэглэхээс зайлсхийх хэрэгтэй. Ингэснээр халдвар авах, хавдах, цус алдах эрсдлийг бууруулна.

 

 

 

 

Эх сурвалж: