Та болон таны ойр дотны хүмүүс ШҮДЭЭ ХАВИРААД байна уу? Өглөө босоход таны толгой болон эрүүний үеэр өвдөж сэрж байна уу?

Тэгвэл

Шүд хавирах нь унтах үед үүсдэг хөдөлгөөний эмгэг юм. Шүдээ хавирдаг хүмүүс хурхирах, амьсгалахад төвөгтэй байх гэх мэт нойрны бусад эмгэгүүдтэй байдаг.

Хөнгөн хэлбэрийн шүд хавиралт нь эмчилгээ шаарддаггүй. Гэсэн хэдий ч зарим хөнгөн хэлбэрийн шүд хавиралт нь хүчтэй байж болох тул эрүүний эмгэг, толгой өвдөх, шүд элэгдэх болон бусад асуудалд хүргэдэг.

Унтах үедээ шүдээ хавирдаг хүмүүс хүндрэл үүсэх хүртэл үүнийг мэддэггүй, тиймээс шүд хавирахад илэрдэг шинж тэмдэгүүдийг сайн мэддэг байх хэрэгтэй.

Шинж тэмдэг

* Хажууд унтаж буй хүнээ сэрээхэд хангалттай чанга шүдээ хавирдаг.

* Хавтгай, хугарсан, хагарсан, сул шүднүүд

* Шүдний паалангаа аажмаар элэгдүүлж шүднийхээ гүн давхаргыг ил гаргана.

* Шүд өвдөх эсвэл мэдрэг болох

* Эрүүний үеэр өвдөх, ам ангайхад хүндрэлтэй байх

* Толгой өвдөж сэрэх

* Хацрынхаа дотор хэсгийг зажилж гэмтээх

* Унтах тасалдал

Дээр дурдсан шинж тэмдгүүд байвал шүдний эмчид хандаарай.

Шалтгаанууд

* Сэрүүн байх үедээ шүдээ хавирах нь сэтгэлийн түгшүүр, стресс, уур уцаар, бухимдал, түгшүүр зэрэг мэдрэмжээс үүдэлтэй байж болно. Эсвэл ямар нэгэн зүйлд анхаарлаа хэт их төвлөрүүлэх үед илэрдэг зуршил байж болно.

* Унтах үедээ шүдээ хавирах нь унтаж байхдаа шүдээ зууж унтахаас үүдэлтэй байж болно.

Эрсдлийн хүчин зүйлүүд

Эдгээр хүчин зүйлс нь шүд хавиралтын эрсдлийг нэмэгдүүлдэг:

* Стресс - Сэтгэлийн түгшүүр, стресс ихсэх нь шүдээ хавирахад хүргэдэг.

* Нас - Шүд хавирах нь бага насны хүүхдүүдэд түгээмэл тохиолддог боловч ихэвчлэн насанд хүрсэн хойно арилдаг.

*Зан чанар - Түрэмгий, өрсөлдөх чадвартай идэвхтэй амьдралын хэв маягтай байх

* Эм ба бусад бодисын гаж нөлөө, тамхи татах, кофейн агуулсан ундаа, согтууруулах ундаа хэрэглэх

* Удамшил

* Бусад эмгэг.

Оношлогоо

Шүдний эмчийн тогтмол үзлэг хийх үед шүдний эмч нь шүд хавиралтын шинж тэмдгийг шалгаж үзэх болно. Шалтгааныг тодорхойлж шаардлагатай бол рентген шинжилгээ авна.

Эмчилгээ

Ихэнх тохиолдолд эмчилгээ хийх шаардлагагүй байдаг. Гэсэн хэдий ч хэрэв асуудал ноцтой бол илүү их шүд гэмтэхээс сэргийлж, эрүүний өвдөлт, таагүй байдлыг арилгах шүдний эмчилгээ хийнэ.

Шүдний эмчилгээ

Шүдний элэгдлээс хамгаалдаг "Шөнийн хамгаалагч" зэмсэг. Хүмүүс ихэвчлэн унтаж байхдаа шүдээ их хавирдаг тул энэхүү хамгаалагч ялтасыг зүүж унтах хэрэгтэй. Энэ нь шүдээ хавирч элэгдэхээс сэргийлэхийн зэрэгцээ эвгүй дуу чимээ гарахаас сэргийлдэг. "Шөнийн хамгаалагч" нь дээд, доод шүдний хэлбэрийг гаргасан зөөлөн материалаар хийгдсэн байна. Мөн орой унтахаасаа өмнө кофейн агуулсан ундаа, согтууруулах ундаа хэрэглэхээс татгалзах хэрэгтэй.